Қазақстанда блогерлер ұйымдастырған ірі ұтыс ойынына қатысты дау туындап, Туризм және спорт министрлігі тексеріс бастады, деп жазады Alash.kz.
Миллиондаған оқырманы бар танымал жұп Ерболат Жанабылов пен Эльмира Төлегенова әлеуметтік желідегі парақшасында 11 автокөлікті ойнататынын жариялаған еді. Олардың аудиториясы 15 миллионнан асады. Жарнамасы қызу жүріп жатқан бұл ұтысқа қатысты қоғамда түрлі пікірлер пайда болды. Азаматтардың бірі акцияның заңдылығына күмән келтіріп, құзырлы органдарға ресми түрде арыз түсірген.
Шағым Мәдениет және спорт министрлігіне қарасты құмар ойын бизнесі мен лотереяларды реттеу комитетіне жеткен. Комитет өкілдерінің хабарлауынша, Ерболат Жанабыловқа ресми хабарлама жіберіліп, түсініктеме беру міндеттелген. Түсініктеменің нәтижесіне қарай әкімшілік іс қозғалуы ықтимал. Егер блогер талапты орындамаса, іс автоматты түрде қозғалып, тіпті блогердің қатысуынсыз қаралатын болады.
Әлеуметтік желідегі пікірлерде де көпшілік бұл ұтысқа күмән келтіріп, мемлекеттік органдарды белгілеп, тіпті Президентке дейін шағым жазған. Себебі заңға сәйкес, лотереяларды тек ресми лицензиясы бар операторлар немесе агенттер ғана өткізе алады. Ал заң бұзылған жағдайда 100-ден 1000 айлық есептік көрсеткішке дейін айыппұл салынуы мүмкін.
Соған қарамастан, блогерлер ұтысты жалғастырып, зауыттан жеткізілген көліктерді көрсетіп жүр. Сонымен қатар олар “инфобизнес арқылы табыс табуды үйретеміз” деп аталатын курсты белсенді жарнамалауда. Алайда арнайы ашылған лендинг бетінде оқу процесіне қатысты нақты ақпарат жоқ, оның мазмұны онлайн-казиноға көбірек ұқсайды.
Министрлік халықты тағы да ескертіп, мұндай күмәнді “гивтер” мен ұтыс ойындары көп жағдайда жеңіске жеткізбестен, ақшаны да, уақытты да жоғалтуға әкелетінін мәлімдеді. Бұған дейін де Атыраудан шыққан бір блогер дәл осындай әрекеті үшін сот алдында жауап берген болатын.
