Ақтөбеде 70 жастағы зейнеткер телефон алаяқтарының құрбаны болып, 18 миллион теңгесінен айырылды. Полицейлердің жедел іс-әрекетінің арқасында оның 9 миллион теңгеден астам қаражаты қайтарылды, деп хабарлайды Alash.kz.
Зейнеткерге белгісіз біреулер SMS жолдап, артынша қоңырау шалған. Өзін eGov пен ұлттық қауіпсіздік органдарының қызметкерлері ретінде таныстырған олар “ақшаңызды хакерлерден қорғау керек” деп сендірген. Осылайша әйелді жинаған қаржысын шешіп алып, курьер арқылы “қауіпсіз шотқа” жіберуге көндірген.
Алдымен ол 20 жыл бойы жинаған 9 миллион теңгесін тапсырған. Кейін қызының қасына шетелге көшуге дайындалып, пәтерін сатып, одан түскен ақшаны да алаяқтарға беріп қойған.
Алаяқтар зейнеткерді екі ай бойы алдап келген. Тамыз айының басында ғана әйел өзіне алданып қалғанын түсініп, полицияға жүгінген. Тергеу барысында қаражаттың бір бөлігі Шымкенттен табылып, тәркіленді.
“Мен өмір бойы мұғалім болып еңбек еттім, өзімді сауатты адаммын деп ойлайтынмын. Бірақ қалайша алаяқтарға сеніп қалғанымды әлі түсінбеймін. Полицияға немесе банкке дер кезінде хабарласқанда мұндай жағдайға түспес едім. Жақында туған күнім, маған қайтарылған қаражат – үлкен сый болды”, – деді жәбірленуші.
Еске салсақ, дәл осы схемамен белгілі журналист, профессор Кәкен Қамзин алаяқтардың құрығына түсіп қалған еді.
