Қытайда жасанды интеллект пен биотехнология саласындағы мамандар адам баласының ең күрделі құбылыстарының бірін, жүктілікті, робот көмегімен жүзеге асыруға талпынып жатыр. Жаңа жоба аясында ғалымдар жүкті әйелдің қызметін атқара алатын ерекше робот құрастыруда, деп хабарлайды Alash.kz.
Зерттеу тобының айтуынша, роботтың негізгі бөлігі – жасанды жатыр. Ол адам ағзасының табиғи жағдайына ұқсас орта қалыптастырып, ұрықты тоғыз ай бойы өсіре алады. Бұл құрылғыға арнайы сенсорлар орнатылып, эмбрионның дамуын қадағалауға мүмкіндік береді.
Жоба жетекшісі доктор Чжанның сөзінше, технологияны жетілдіру арқылы медицина саласында жаңа мүмкіндіктер ашылады. Мәселен, шала туған сәбилерге арналған инкубатордың орнына жасанды жатыр қолданылса, нәрестелердің өмір сүру мүмкіндігі әлдеқайда артады. Сонымен қатар, бедеулік мәселесін шешу жолында да бұл құрылғының үлесі зор болуы мүмкін.
Алайда ғалымдар бұл бастаманың тек ғылыми тәжірибе деңгейінде тұрғанын жасырмайды. Прототиптің алғашқы таныстырылымы келесі жылы өткізіледі деп жоспарланған. Ал құрылғының бағасы шамамен 100 мың юань (7,5 миллион теңге) болады деген болжам бар.
Әзірге басты қиындық – ұрықтандыру процесін жасанды ортаға толық көшіру және эмбрионның дамуына кері әсер етпеуін қамтамасыз ету. Бұл бағыттағы тәжірибелер жалғасып жатыр.
Мамандардың пікірінше, жасанды жатыр мен роботтық ананың енгізілуі қоғамда түрлі пікірталас туғызуы мүмкін. Бір тарап мұны медицинадағы үлкен жетістік десе, енді біреулер адам табиғатына араласу деп қабылдауы ықтимал.
Қалай болғанда да, қытайлық ғалымдардың бастамасы әлем ғылымының назарын аударды. Егер тәжірибе сәтті аяқталса, болашақта жүктілік пен босану үдерісі мүлде жаңа сипат алуы ғажап емес.
