Орал қаласында 8 жасар бала ауыр жарақат алып, көз жұмды. Артем есімді жеткіншектің денесінің 96 пайызын күйік шалып, бір аптадан кейін ауруханада қайтыс болғаны белгілі болды, деп хабарлайды Alash.kz.
Полиция бұл оқиғаны жазатайым жағдай деп тіркеген. Алайда ата-анасы баланы әдейі өртеген деген күдікте.
Қайғылы оқиға 10 тамыз күні болған. Артем жазғы демалысын әжесінің үйінде өткізіп жүрген. Сол күні әжесі Алматыда жүрген қызына телефон шалып, “Артемді өрт шалды, тез жет” деп хабар берген.
Артемнің анасы Мухаббат ол сәтті көз жасымен еске алады: “
Анам қатты абыржып, жылап тұрды. Мен одан видеоқоңырау қосуды сұрадым. Қосқанда, балам дәлізде отыр екен. Жанында полиция қызметкері мен анам болды. Денесі түгел күйіп қалғанымен, есін біледі. Бірнеше рет “Мені өлтірмек болды’ деп қайталады”, – дейді ол.
Ата-анасы сол күні шұғыл түрде Оралға жеткен. Дәрігерлер баланың тыныс жолдары зақымданғанын және денесінің 96 пайызы 4-дәрежелі күйік шалғанын айтқан.
“Біз қолдан келгеннің бәрін істеп жатырмыз, бірақ құдірет қолымызда емес. Алладан жәрдем сұраңдар”, – деген дәрігерлер.
Өкінішке қарай, бір аптадан соң Артем көз жұмды.
Полицияның ресми нұсқасына сәйкес, бала аулада ойнап жүріп, көліктің дұрыс жабылмаған жүк салғышынан бензин құйылған канистр тауып алған. Бензинді жерге төгіп, от жаққан кезде жалын үстіне ауысып кеткен. Сол сәтте тағы бір бала да жарақат алған. Тергеу ісі “жазатайым оқиға” ретінде жабылған.
Алайда ата-анасы бұл тұжырымға сенбейді. Олардың айтуынша, куә болған балалар оқиғаның мүлде басқа нұсқасын жеткізген. Бір қыздың сөзіне сүйенсек, сол күні Артеммен бірге ойнаған 6 жасар Тамерлан оған “өзіңді бензинге малып, от қоюды” ұсынып, тіпті ақша бергісі келген. Артем келіспеген соң, ол баланың үстіне бензин құйып, жанған сіріңкені тастаған. Бұл жайтты көзімен көрген бала болса да, полиция одан ешқандай түсініктеме алмаған.
Артемге алғашқы көмек көрсеткен екі жасөспірім оқиға кезінде аулада ересектер де болғанын айтқан. Алайда полицейлер оларды да, куәгер ересектерді де сұрастырмаған. Баланың әжесімен де, жедел жәрдем дәрігерлерімен де сөйлеспеген. Ал Артемнің өзі қайталап айтқан “Мені өлтірмек болды” деген сөзін естіген куәгерлердің сөзі назарға алынбаған.
Іс материалында бар болғаны үш адамның жауабы тіркелген: көлік жүргізушісі (оқиға кезінде орнында болмаған), Тамерлан және бұл жағдайға қатысы жоқ бір бала.
“Біз ұлымызды қайтара алмайтынымызды білеміз. Бірақ әділдікті қалаймыз. Қазір бар кінәні Артемнің өзіне артып отыр. Алайда жағдай мүлде басқаша екенін білеміз. Егер мұны басқа бала жасаған болса, ол өзгелерге де қауіпті. Біз істі қайта тергеп, куәгерлерді түгел сұрауды, сараптаманың нәтижесін есепке алуды талап етеміз. Сараптама әлі дайын да емес. Ал полиция істі зерттеместен жауып тастаған”, – дейді ата-анасы.
