Қазақстанның актрисасы, продюсер Айнұр Ілиясова әлеуметтік желілерде жазба жариялап, Алматыдағы А.Н. Сызғанов атындағы Ұлттық ғылыми хирургия орталығы анестезиологының ақша сұрағанын жазды. Актриса хабарлауынша, дәрігер отадан кейін ақша талап еткен, - деп хабарлайды Alash.kz ұлттық порталы.
Айнұр Ілиясованың анасына А.Н. Сызғанов атындағы Ұлттық ғылыми хирургия орталығында ота жасалған. Ота алдында әйелден жақын туысының байланыс нөмірін қалдыруды сұраған. Алайда жазба авторының айтуынша, анестезиолог ол нөмірді жеке пайдасына сұраған.
"Ол маған жазып, ақша талап етті. Мен клиника директорына шағымданып, мәселені қарауды өтіндім. Бірақ мұндай әрекеттерді тоқтатудың орнына, отадан шыққан анама сол анестезиолог келіп, "қызын тыныштандыруды" талап еткен. Бұл жай ғана кәсіби этиканы бұзу емес. Бұл - ауыр хәлде жатқан науқасқа қысым көрсету", - деп жазды ол.
Сызғанов атындағы Ұлттық ғылыми хирургия орталығы Tengrinews.kz-ке пікір білдірген.
"Қазір осы шағым бойынша қызметтік тергеу жүргізіліп жатыр. Нәтижелері заңда белгіленген мерзімде өтініш иесіне ұсынылады", – деп жазылған орталық жауабында.
