Астанада белгілі блогер даулы видеолары үшін әкімшілік жазаға тартылды, деп жазады Alash.kz.
ҚР Ішкі істер министрлігінің баспасөз қызметі мәліметінше, 33 жастағы ер адам көңіл көтеру орнының арт-директоры бола жүріп, әлеуметтік желідегі арнасында арандатушылық контент жариялаған. Желіде тараған бейнероликтерде ол мекеме қонақтарына тиісіп, бейәдеп қылықтар көрсеткен, балағат сөздер айтып, дөрекі әрекеттерге барған. Бұл жазбалар қала тұрғындарының наразылығын туғызды.
Сот шешімімен блогер 15 тәулікке әкімшілік қамауға алынды. Ол қоғамдық тәртіпті өрескел бұзғаны, өзгелерге құрметсіздік танытқаны және балағат сөздер қолданғаны үшін жауапқа тартылды.
ІІМ әлеуметтік желілерде танымал болу үшін заңды бұзуға болмайтынын ескертті.
“Қаралым мен лайк үшін жасалған әрекеттер ешқашан заңсыздықты ақтай алмайды. Мұндай фактілердің барлығы заңға сәйкес тоқтатылады”, – делінген хабарламада.
