“Мисс Қазақстан – 2022” иегері Томирис Қакимова жеке өмірі туралы шынайы әңгімесімен жанкүйерлерін таңғалдырды, деп хабарлайды ALASH.KZ.
Әлеуметтік желіде 1,3 миллионнан астам қаралым жинаған қысқа бейнежазбада бұрынғы модель бір жыл бұрын тұрмысқа шыққанын және қазір ауылда тұратынын айтты.
«Мен – “Мисс Қазақстан – 2022”, өткен жылы тұрмысқа шықтым. Күйеуім есімін Абиль деп таныстырды. Мен ойладым: астаналық жігіт, бизнес-класс, таңғы асқа смузи. Сөйтсем, ол Қызыл-Қақ ауылынан Әбіл екен. Мұнда смузи орнына – қымыз, Uber орнына – әкесінің тракторы», – деп бөлісті Томирис.
Бейнежазбада ол ауыл өмірінің өзі армандағандай романтикалық емес екенін, бірақ соған қарамастан, шын махаббатты тауып, өміріне жаңаша көзқараспен қарағанын айтады.
«Мен Нью-Йорктегі зәулім ғимараттарды армандадым, ал ол ауылдың батыс жағын айтып жүр екен. Бірақ ол жақ та әдемі – адамдар көңілді, сиыр иісі, керемет көрініс. Ол мені өз әлеміне әкеліп қана қоймай, қасымда болды. Мен ыдыс жуып жатқанда да қасымда отырып, көмектесіп, қалжыңдайтын», – дейді модель.
Гламур әлемінен, сән көрсетілімдерінен, жарқыраған камералар мен астаналық кештерден бас тартып, Томирис қарапайым, жылы әрі махаббатқа толы өмірге қадам басты. Оның айтуынша, дәл қазір өзін шынайы бақытты сезінеді.
«Мен – “Мисс Қазақстан”, подиум мен софиттерге үйренгенмін. Енді бауырсақ ұстаған орамалды келіншекпін. Бірақ дәл қазір өзімді шынайы сезінемін. Мен жылтыр өмірден айырылып жатырмын деп ойладым, ал шын мәнінде – ауылдағы, шынайы махаббатты таптым», – деп түйіндеді ол.
