Түркістан облысының Сарыағаш қаласында 19 жастағы Жасұлан Әбдіманаптың жұмбақ қазасына негізделген қылмыстық іс бойынша алғашқы сот тыңдалымы өтті, деп жазады Alash.kz.
Жасұлан биыл 20 ақпанда үйінен шығып, сол күйі оралмаған. Екі күннен кейін оның мүрдесін жайлауда жүрген бақташы тауып алған. Марқұмның денесінде 14 жерден пышақ ізі болған.
Қайтыс болған жігіттің анасы Райхан Жамалованың айтуынша, баласын өз таныстары алдап, атына бірнеше несие рәсімдеп, қарызын қайтармай келген. Ақырында олар Жасұланды елсіз жерге апарып, аяусыз өлтірген.
Баламды алдымен ұрып-соғып, кейін 14 рет пышақтаған. Басты күдікті — ефрейтор. Ол баламның соңынан қуып жүріп, пышақ сұққан. Куәгер көлікте отырған, бірақ қорқытқан соң үндемеген.
Күдіктілер үшеу. Олардың бірі – ефрейтор әскери қызметкер. Тағы екеуі қылмысты жасыруға көмектесті деп айыпталып отыр. Қылмысқа ефрейтордың қызының да қатысы бар. Ол сыбайлас ретінде іс материалында тіркелген.
Тергеу нұсқасына сай, басты шабуылды әскери қызметкер жасаған. Қазір сотта айыпталушылар кінәні бір-біріне артып, жауапкершіліктен жалтаруға тырысып отыр.
Жасұлан – отбасындағы кенже бала болған. Кішкентай кезінде миына жасалған ауыр отадан кейін ұзақ емделген. Кәсіп ашуды армандаған, болашаққа сеніммен қараған жас жігіт.
Қайғыдан қан жұтқан ана барлық кінәлілер қатаң жазаға тартылуын талап етуде.
