Астана қалалық ауданаралық соты қайырымдылық қоры арқылы жиналған аса ірі көлемдегі қаражатты жымқырғаны үшін Перизат Қайрат пен оның анасына үкім шығарды, деп жазады Alash.kz.
Перизат Қайрат 10 жылға бас бостандығынан айырылды.
Ал, оның сыбайласы деп танылған анасы Ғайни Алашбаева 7 жыл көлемінде жаза арқалады.
Мемлекеттік айыптаушы үш эпизодты бөліп көрсетті:
- мүгедектігі бар балаларға көмек көрсету,
- Таяу Шығыста зардап шеккендер
- Қазақстандағы су тасқынынан жапа шеккендерге көмек көрсету.
Қоғам белсендісі Қылмыстық кодекстің келесі баптары бойынша кінәлі деп танылды:
- 190-баптың 4-бөлігі 2-тармағы – "Аса ірі мөлшерде жасалған алаяқтық";
- 218-баптың 2-бөлігі 1-тармағы – "Алдын ала сөз байласу арқылы адамдар тобы жасаған қылмыстық жолмен алынған ақша қаражатын және басқа мүлікті заңдастыру (жылыстату)";
- 218-баптың 3-бөлігі 3-тармағы – "Аса ірі мөлшерде қылмыстық жолмен алынған ақша қаражатын және басқа мүлікті адамдар тобының заңдастыруы".
Осы айыптауларға сәйкес Перизат Қайрат пен оның анасынан тәркіленді:
- “Vela Village” коттедж қалашығындағы жеке үй;
- “Akbulak Riviera”, “Sensata Plaza”, “Highvill Ishim Gold”, “Көк Жайлау” тұрғын үй кешендеріндегі пәтерлер мен тұрақ орындары;
- “Mercedes-Benz S450” 2024 ж., “Lexus LX 600” 2024 ж.;
- “Rebel Flowers” ЖШС-нің жарғылық капиталындағы 100% үлесі;
- 97 млн теңгеден астам қаражат және 22 мың АҚШ доллары.
Жәбірленушілердің азаматтық талап қоюлары қанағаттандырылды. Үкім заңды күшіне енген жоқ.
