Қарағанды қаласында 27 жастағы келіншектің жұмбақ өліміне қатысты іс қоғам назарын аударды, деп жазады Alash.kz.
Марқұм - Шымкент қаласының тумасы Динара Мыңбаева. Ресми мәлімет бойынша, келіншек өз-өзіне қол жұмсаған. Оның денесі өз үйінен табылған. Алайда марқұмның жақындары бұл нұсқаға сенбейді.
Динара бірнеше жыл бұрын Сарыағаш ауданының тұрғынына тұрмысқа шығып, Қарағандыға көшіп барған. Сол жақта медициналық білім алып, екі баланы дүниеге әкелген. Жақында магистратураға тапсыруды жоспарлап жүрген. Алайда 3 шілдеде оның ата-анасына қаралы хабар жеткен.
Марқұмның анасы Ризагүл Ақынбаеваның айтуынша, қызының өз-өзіне қол жұмсауы мүмкін емес.
“Өзіне қол жұмсады дегенге сенбеймін. Сол күйеуі кінәлі деп ойлаймын. Әйтпесе мен бір апта бұрын Қарағандыға барғанмын. Сол кезде күліп-ойнап жүрген еді. Өз-өзін асып қойды дегенге ешқандай сенбеймін. Өз-өзіне қол жұмсайтын қыз емес ол. Екі баласын шырылдатып, қалай тастап кетеді?!“
“Сағат үш жарымда ғана естідік қайтыс болғанын. Сол уақытқа дейін бұлар не істеп, не қойғанын білмейміз. Өлімді жасырды бізден. Айтпады бізге. Мүмкін тұншықтырып өлтіріп қойып, “асылып өліп қалды” деп отыр ма?! Сондай күдігіміз бар біздің. Қылмыс болғанына 20 күн өтті. Ешқандай іс-әрекеттер болып жатқан жоқ. Тергеушілер ауысып кетті. Қазір қандай тергеуші екенін звондасақ, алмайды. Бізбен хабарласпайды да” дейді марқұмның әкесі Дүйсекен Мыңбаев.
Оның айтуынша, 2 шілдеде Динара телефон арқылы хабарласып, күйеуінің қол көтеріп, қылқындырғанын айтқан. Әкесі бірнеше күн ішінде Қарағандыға бармақ болғанымен, үлгере алмаған.
Марқұмның жақындары тергеу барысына көңілдері толмайтынын жеткізді. Жәбірленуші тараппен тұрақты байланыс орнатылмаған.
Қазіргі таңда бұл оқиға ҚР Қылмыстық кодексінің “өзін-өзі өлтіруге итермелеу” бабы бойынша қаралып жатыр. Алайда Динара Мыңбаеваның ата-анасы бұл бап жеткіліксіз деп санайды. Олардың пікірінше, марқұмның күйеуі де тиісті жауапқа тартылуы тиіс.
