Елге танылған әнші Қанат Айтбаев марқұм әкесін еске алып, ата-анасының берген тәрбиесі жайлы сөз етті, деп хабарлайды Alash.kz.
Балалық шағым еске түседі... Жалтыраған тақырбастың үстіндегі алақандай айдары желмен желбіреп, жаңа ғана сатып алып келінген су жаңа велосипедпен бір бала зырғып барады... Ол - мен. Сол кездері дүкенге көп түсе бермейтін дүниені əкем Ақтөбедегі ағайындарға арнайы тапсырып, қайта-қайта сұратып жүріп, алдырған болатын. Екі дөңгелекті көлікті көргенде алақайлап қуанғаныма өзі де шат-шадыман...
Кейін әнші әкесіне қатысты естелігін кеңейте жазып, берген тәрбиес жайлы жеткізді:
- Жазғы каникулда əкемнің машинасынан қалмаймын - егістік басындағы механизаторларға, қой ауылдағы малшыларға жиі барамыз. Даланың даңғыл жолында əкем ГАЗ 69 -дың руліне мені отырғызып, көлік жүргізуді үйретеді...Мотордың құрылымын, қозғалтқыштың жұмыс істеу жүйесін түсіндіреді, қайталап сұрайды. "Менің балам техникаға өте бейім, ықтиятты" деген мақтауын есту -алты оқитын бала үшін үлкен бақыт...Үйге қонақ көп келеді, анам ас əзірлеп, əкем меймандармен əңгіме дүкен құрады. "Ағалардың жақсы сөзін тыңда" деп əкем қасына алып отырады... Кей күндері жұмыстан кейін қолына домбырасын алып, Қазанғаптың, Құрманғазының күйлерін төгілтеді, үйдің іші сиқырлы үнге толады, бəріміз беріле тыңдаймыз...Өзінің ұстаздарының, құрметтеп, сыйлайтын азаматтардың жақсы істерін мысал етіп айтады. Басты принципі "Ұлық болсаң -кішік бол", "Біреудің ала жібін аттама" - үнемі қайталап отырады...Кешке таман əкем жұмыстан келетін кезде бəріміз дайындаламыз - əпкем мен қарындасым су сеуіп есіктің алдын сыпырады, анам самаурынға от салып, ағаштың көлеңкесіне көрпе төсеп, дастархан жаяды. Мен қолға су құятын құман əзірлеймін... Отбасымызбен шүйіркелесе отырып кешкі салқынмен шай ішеміз...Қазір өзім де əкемін. Бірақ əлі күнге дейін əкеме еркелеп өскен алаңсыз балалық шағымды аңсайтын сәттер аз емес.... Бүгін әкемнің туған күні еді...Рухы пейіштің төрінде шалқығай! - деп жазды әнші.
