Танымал журналист Руслан Өтепбай арнайы шақыртумен күйеуінің қолынан қатыгездікпен қаза тапты деген Айзат оқиғасын зерттеуге барды, - деп хабарлайды Alash.KZ ozgeris.info сайтына сілтеп.
Ол Айзаттың жақын құрбысы Мадина Қайратқызымен тілдесті.
"Әлі күнге дейін сене алмаймын, өте қиын. Күйеуі қол көтерген, ұрған деп ойлаймын. Өзі құлап кетті дегенге сенбеймін. Миға қонымсыз, Айзат оған дейін телефонын әжетханаға түсіріп алған. Құлап кеткенін қалай суретке түсіреді? Сау-тамтығы жоқ. Адам сондай күйге жетеді деп үш ұйықтасам түсіме кірмес еді. Еті сүйегіне дейін көрініп сырылып қалған. Мен не істегенін білмеймін", - дейді көзі жасқа толған құрбысы.
Оның сөзінше, күдікті Айбар шектен тыс қызғаншақ болған, ал құрбысы оның көзіне шөп салды деген ақпар шындыққа жанаспайды.
"Айзат мені қонаққа шақырған. Ол тұратын ауылға барғанмын. 10 шақты үй бар, оның төртеуінде ғана адам тұратын шығар. Күйеуінің көзіне шөп салды дейтіндей, ол жақта еркек те жоқ. Сеть те ұстамайды. Ол күйеуін қатты жақсы көрді. Оның барлық әлеуметтік желісі Айбардың телефонына қосулы болатын. Тіпті бізге артық ештеңе жазбайтын, тек қоңырау шалатын. Күйеуінің жаман жағын барынша жасыратын. Айбар оны қатты қызғанатын, ал қызғанышқа негіз жоқ. Тіпті дүкенде кезекте тұрып қалса да сен қайда жүрсің деп қысымға алатын. Менің үйіме Айзат келетін болса, күйеуімді басқа жаққа жіберемін. Өйткені Айбар үйдің бәрін артық ешкім жоқ па деп тексеріп шығатын. Қызын әдейі жатын бөлмеге апарып ұйықтатады. Осындай қызғаншақ болды", - деді ол.
