Қазақ тілінде қызмет сұраған демалушыға қоқан-лоқы көрсеткен демалыс орны сынға ұшырады, деп жазады Alash.kz ұлттық порталы “Тіл кеспек жоқ” Telegram арнасына сілтеме жасап.
Жетісу облысындағы Ostrov-ok.kz демалыс орнында қазақ тілінде қызмет көрсетуді сұраған демалушыға дөрекілік танытылып, этникалық сипаттағы қорлайтын сөздер айтылғаны туралы ақпарат тарады. Бұл жағдай Threads желісінде жарияланып, әлеуметтік желі қолданушыларының қызу талқысына түсті.
Оқиғаға қатысы бар қызметкер:
“Біз орыс ұлты болмағанда мемлекетің де болмайтын еді. Үкімет халықты тонағанша, тілді үйретпеді ме? Путин Қытайды назардан тыс қалдырмағандай, бұны да қалдырмайды” деп жазған.
Қолданушылар бұл сөздерді этникалық өшпенділік деп бағалап, бірден 2Гис қосымшасында пікірлер қалдырып, мекеме рейтингісін түсіріп жіберді.
Дауға байланысты өзін демалыс орны қызметкерінің әкесімін деп таныстырған Сергей Быков мәлімдеме жасап, Қазақстан азаматы екенін, мемлекеттік тілді құрметтейтінін айтқан. Ол бұл мәселе реттелетінін және түсіністікпен қарауды сұраған.
Қоғам наразылығын тудырған оқиғаға байланысты демалушылар заң алдында жауапкершілік қаралуын талап етуде.
