Қырғызстанның Ош облысы, Өзгөн аудандық соты мектептегі кездесу кешінен кейін әйелін өлтірген ер адамға үкім шығарды, деп жазады Alash.kz ұлттық порталы.
Айыпталушы А.Б.К. 18 жылға бас бостандығынан айырылып, 100 мың сом айыппұл төлеуге міндеттелді. Бұл туралы Қырғыз Республикасының Жоғарғы сотының баспасөз қызметі хабарлады.
Сот 2025 жылғы 31 шілдеде шыққан үкімінде айыпталушыны келесі баптар бойынша кінәлі деп таныды:
- Қылмыстық кодекстің 122-бабы, 2-бөлім, 3-тармағы: «Қорғансыз күйдегі адамды өлтіру»;
- 267-бап, 1-бөлім: «Қаруды, оқ-дәріні заңсыз айналымға шығару»;
- 267-бап, 2-бөлім: «Атылатын қаруды заңсыз сатып алу, сақтау, тасымалдау және алып жүру».
Марқұм Айзирек Ералиева - Қара-Күлджа ауданының 38 жастағы тұрғыны. Қайғылы оқиға 2024 жылғы 26 мамырда болған. Ерлі-зайыптылар мектеп бітіргендеріне 20 жыл толуына орай ұйымдастырылған кешке қатысқан. Кештен кейін ер адам әйелін соққыға жығып, кейін атып өлтірген.
Марқұмның туыстары тергеу барысына наразылық білдіріп, іске кейбір деректердің өзгертіліп енгізілгенін алға тартты. Айыпталушы оқиғаны байқаусызда болған деп сипаттағанымен, марқұмның әпкесі Миргүл Токтоназарова бұл мәлімдемені жоққа шығарды.
Қаза тапқан Айзирек Ералиеваның артында бес баласы қалды.
