31-шілде Қазақ айтыс өнерінің бірегей майталманы, Сырдың сүбелі ақыны Серік Ыдырысов қайтыс болды, деп хабарлайды Alash.kz.
Суық хабарды алғашқылардың бірі болып естіген Елена Әбдіхалықова ақын-ағасының ақ пейілдігін айтып, әсерлі жазба қалдырды:
Секең елдің азаматы еді. Қайбір жылы менің мерейтойымды: “ешкім атап өтпесе, өтпесін, бүкіл Сыр бойынан өзім барып құттықтаймын!” – деп, бір топ іні-қарындасын ертіп келгенде көңілім көкке көтерілген еді.
Биылғы шығармашылық кешіме келуге денсаулығы жарамай қалғанын айтып еді… Жан баласына титтей қиянаты жоқ, көңілі көлдей, жарқыраған жігіт еді. Тағдыр тауқыметін қайыспай көтерген, бір әулеттің алып бәйтерегі болатын. Өнердегі іні-қарындастарына ақ батасын аямай, жылылығын төгіп отыратын кеңдігі қандай еді…
Бәзбіреулер секілді “өзімнен ешкім аспаса екен” деген пиғылдан ада болатын. Нағыз дарқан жүректі азамат еді.
Орны толмас қазаға қабырғасы қайысқан ақын, әнші Төреәлі Төлепов көңіл айтты:
“Қазақтың құрметті азаматы! Ақ иық ақыны, Сырдың серісі Серік ағам- ай! Талайлардың таңдайын қақтырып, таң қалдырып, терең оймен сөз саптап, қиыннан қиыстырып айтудың шебері едіңі. Халқыңыз ұйып тыңдайтын ерекше жан едіңіз! Сыр еліне бес бірдей, бес елдің Президенті табан тірегенде арнайы елдің сәлемін жолдап арнау айтқаныңызды, талай ақындарға жол көрсетіп, ақыл айтып ұстаз болып, бесікте жатқан шақалақ Төреғалиға арнайы келіп аузына түкіріп батаңызды бергеніңізді бірі білсе, бірі білмес! Ізіңізге еріп өнегелі өнеріңізге куә болып, өмірімізге жетер азық алдық аға! Алла панасына алып, қабырыңызды нұрландырып. жатқан жеріңіз жәннәт болсын!“
Руслан Каюпов:
"Қош бол, Ақын аға! Абыз аға!
Алашқа белгілі ақын, Қазақстанның өнер қайраткері, ҚР мәдениет саласының үздігі, үлкен жүректі ұстаз Ыдырысов Серік Махмұтұлы келместің кемесіне мініп, мәңгілік сапарға аттанды.
Ақтық сапарға шығарып салу қаралы митинг 1 тамыз күні сағат 15:30-да, жаназа намазы 16:00.
Өтетін орны: Қызылорда қаласы, Ыдырысов тұйығы 4-ші үй", - деп жазды.
