Талдықорғанда Шерзат Болатты (Полатты) өлтіру ісі бойынша сот процесі жалғасуда, деп хабарлайды ALASH.KZ.
Сот отырысы әлеуметтік желіде бұған дейін жарияланған айыпталушылардың видеосын талқылаудан басталды.
Қоғамда үлкен резонанс тудырған кадрлар сот залында қызу пікірталасқа себеп болды.
Бейнежазбада айыпталушылардың камерадан күліп шыққаны көрінеді. Бұл жағдай әлеуметтік желі қолданушылары мен қоғам арасында наразылық тудырды.
Сот барысында видеоны кім түсіріп, кім таратқанына қатысты қарама-қайшылықтар туындады.
Адвокаттардың бірі сот отырысында оның мобилографы жұмыс істегенін айтты, алайда дәл осы бейнероликтің оның көмекшісі тарапынан түсірілмегенін мәлімдеді.
Судья Ержан Жанұзақов бейнероликтің таралу дерегі бойынша тергеу жүріп жатқанын айтты.
