КешREC» бағдарламасында белгілі әнші Ұлықпан Жолдасов өмірінің маңызды кезеңдері туралы мәлім етті, деп хабарлайды ALASH.KZ Azattyq Rýhy сайтына сілтеме жасап.
Әнші мойнында қалдан қалған дақ бар екенін, оны шашымен жабатынын жасырмады.
«Онсыз да шашым ақырындап түсіп жатыр. Жақында толық түсетін секілді. Имидж ауыстырып қайтемін?! Жалпы менің мойным ұзын. Мойнымда алаққанның көлеміндей қал бар. Оның өз тарихы бар. Шешем құрбысымен бірге ауылдағы құмалақ ашатын, көріпкел Аюп деген емші атамызға барып, «құрбыма құмалақ ашып беріңіз» деп сұрайды. Ол көзі көрмейтін кісі еді. Сол кісі «әй, құмалақ құрбыңа емес, саған түсіп тұр» дейді. Кейін «Сенің кішкентай балаң бар екен. Үйге барған соң қара, мойнында, желке тұсында алақандай ақ қал болу керек. Болса жеті мүшесінің біреуі кем болады, бірақ аман болады. Ал болмаса – қауіп. Мал соясың ба, садақа бересің бе, бірдеңе қыл» деген», - деп еске алды өнерпаз.
«Далада ойнап жүр едім, анам мені айғайлап шақырып алды. Барып едім, «бар екен, бар екен» деп кетіп қалды. Күнде таңертең оятып алады да, қалдың орнын сиямен сызады. Сызғанда орны қарая береді екен. Қарайып-қарайып жоқ боп кетеді. Содан қалған дақ бар. Бір жағынан шашыммен соны жабамын. Жеті мүшесінің біреуі кем болады дегендей, кейін 3-сыныпта қолымды сындырдым. Қазір қолым қатты бүгілмейді. Қысқарып қалған, бір жағынан қисық. Осы қолмен әскерге барып келдім. Қолымды жасырып, хирургке ақша беріп, тексерістен өтіп кеттім», - дейді өнерпаз.
