Алматыдағы Әбілхан Қастеев атындағы мемлекеттік өнер музейінде өткен мәдени шара кезінде тегін сыра таратылғаны үшін дау туындады, деп хабарлайды Alash.kz.
Қазақстандық блогер Құрманғазы Нияз Қастеев музейінде ұйымдастырылған шарада алкогольдің (сыраның) тегін таратылғанын сынға алып, ұйымдастырушыларға наразылығын білдірді. Ол бұл сәтті видеоға түсіріп, әлеуметтік желіге жүктеген.
"Бұл мұражай ма, әлде сыра тарататын бар ма? Бізде енді музейлерде де алкогольді насихаттай ма? Мұндайға кім рұқсат берді, қалайша бұл жүзеге асты – мұны құзырлы органдар анықтауы керек", – деп ашуланды видеода автор.
Оның бұл пікірін көптеген желі қолданушылары қолдады.
"Музей сыраханаға айналып кеткен бе?", "Қазақ бейнелеу өнерінің абыройын аяққа таптады", "Мынау – масқара! Мұндай жауапсыздық бола ма? Тиісті органдар қарап отыра бере ме? Кінәлілер жауапқа тартылуы тиіс" – деп жазды желідегілер.
