6 шілде күні Қонаев қаласында тұрмыстық зорлық-зомбылықтың сорақы оқиғасы орын алды. Ер адам өз жұбайын көшеде, өтіп бара жатқан қыз-келіншектердің көзінше аяусыз ұрып-соққан. Бұл туралы оқиға куәгерлері Jagdai Telegram арнасына хабарлаған, деп жазады Alash.kz.
Куәгерлердің айтуынша, әйел екі кішкентай қызымен бірге үйден шұғыл түрде кетуге мәжбүр болған. Жанашырлық танытқан азаматтардың бірі зардап шеккен ана мен балаларын уақытша өз үйіне паналатқан.
Алайда оқиғадан кейін де ер адам тоқтамай, отбасыға қысым көрсетіп жатыр екен. Ол әйелдің анасын аңдып, жұбайын күштеп үйіне қайтаруға тырысуда. Зардап шеккен әйел өзі мен балаларының қауіпсіздігі үшін алаңдаулы.
Құқық қорғау органдары бұл оқиға бойынша әзірге ресми мәлімдеме берген жоқ. Куәгерлердің айтуынша, жәбірленуші тиісті органдардан қорған сұрауға ниетті.
