Тараз қаласындағы №54 мектептің 10-сынып оқушысы Қыдырәлі Қыздарбек ерлік жасап, бейбір күннің қаһарманы атанды. Жүрегінде түгі бар оқушы өрт кезінде ерлік танытып, бесіктегі баланы қалың түтін арасынан алып шыққан, деп хабарлайды Alash.kz.
Бұл жайлы Halyqstan телеграм арнасы хабарлады.
Куәгерлердің айтуынша, 15-шағынаудандағы көпқабатты үйдің бесінші қабатынан шыққан өрт кезде ол екі кішкентай баланы аман алып шыққан.
Оқиға орнында болған тұрғындар мектептен қайтып келе жатқан оқушының терезеден шыққан қою түтінді көріп, бірден көмекке ұмтылғанын айтты.
«Адамдар көшеге қашып шығып жатты. Ал Қыдырәлі еш ойланбастан үйдің кіреберісіне қарай жүгірді. Пәтерде өрт болып жатқан кезде ішінде екі бала болған. Бірі бесікте жатқан, екіншісі ойнап жүрген. Ол балаларды көтеріп алып шығып, жылап тұрған анасына тапсырды. Кейін пәтерде тағы біреу қалып қоймады ма деп, өрт сөндірушілер келгенше қайта кіріп шықты», – дейді тұрғындар.
Өрт сөндірушілер келгеннен кейін Қыдырәлінің үйіне қайтқаны хабарланды.
