Бүгін қазақ атын әлемге әйгілеген әнші Димаш Құдайбергеннің туған күні, деп хабарлайды ALASH.KZ порталы.
Жаһан жұртшылығына белгілі әнші 1994 жылы 24 мамырда Ақтөбеде туған. Ол ҚР мәдениет қайраткерлері Қанат Құдайбергенұлы мен Светлана Айтбаеваның отбасында дүниеге келген. Ата-әжесі де өнерден алыс емес, бірі домбыра тартса, екіншісі ән айтатын.
Белгілі режиссер Асхат Маемиров әншіні және әншінің отбасын құттықтап, мерейлі күнде жақсы тілек айтты:
Халқымыздың аяулы перзенті, Қазақстанның Халық артисі ДИМАШ ҚҰДАЙБЕРГЕН баламызды туған күнімен шын жүректен құттықтаймыз.Димаш өзінің ғажайып музыкасы арқылы әр жүрекке мейірім шуағын төгеді, әр санаға ізгілік дәнін себеді. Әндеріңмен Әлемді тербете бер!Өмірлік мақсат-мұраттарыңның орындалуына нәсіп етсін! Өмірің әрқашан бақыт пен жақсылыққа толы болсын! Ғұмыр жасың ұзақ болсын!Димаш өзінің дауысымен, әндерімен миллиардтаған көзі қарақты көрерменнің санасына жол салды.Тұлпардай текті, сұңқардай қанатты Димаш - ән аспанында қалықтай бер!Айтбаевтар әулетінің алтын діңгегі - Миуа анамыз Сенің қуанышыңа кенеле берсін!Қанат-Света - шаңырақтарыңды әрқашан шаттық әні мен бақыт жыры тербетсін!
Димаш Құдайбергеннің жетістіктері де ерекше. Дарын иесі бес жасында музыкалық колледж сахнасында алғаш әнші ретінде ән салған. Алты жасында “Айналайын” Республикалық байқауының “Фортепиано” номинациясында жеңімпаз атанған.
2010 жылы "Байқонырдың Әсем дауыстары" Халықаралық фестивалінің І жүлде лауреаты атанды.
2012 жылы “Жас қанат” Республикалық жас ән орындаушылар байқауының Гран-при жүлдесіне ие болды.
2012 жылы “Восточный базар” Халықаралық байқауында І жүлде лауреаты атағына ие болды. Бір жылдан соң, “Мейкин Азия” І Халықаралық фестивалінің жеңімпазы болып атанды.
2014 жылы Ақтөбе қаласында А.Жұбанов атындағы Музыкалық колледжінде “академиялық ән орындау” факультетін бітіріп, Қазақ Ұлттық өнер университетінің “эстрада өнері” факультетіне түсті.
2015 жылы Витебск қаласында XXIV Халықаралық эстрадалық ән орындаушылар «Славян базары-2015» байқауында Гран-при жеңіп алды.
2015 жылы 28 қазан күні Ыстамбұлда Димаш Құдайбергенов “Abu TV” Халықаралық Азия-Тынық мұхит фестивалінде Қазақстан атынан алғаш рет қатысты.
2017 жылы Қазақстанның сүйікті әншісі Димаш Құдайбергенов "Top Chinese Music Awards" номинацияның жеңімпазы атанды.
2017 жылы Димаш Құдайбергенов Қытайдағы "Singer 2017" жобасында екінші орын алды. Осы кезеңнен бастап Димаш Құдайбергенді барша әлем таныды.
