Сіздерді 9-мамыр – Ұлы Жеңіс Күнімен шын жүректен құттықтаймыз. Оқырман назарына Жеңіс күніне арналған үздік тілектерді ұсынамыз.
***
Ерлік пен өрліктің даңқын асқақтатқан мереке құтты болсын! Бұл мереке – жанқияр батылдықтың, рухты батырлықтың, еңселі елдіктің даңқы аспандап, Жеңіс жалауы желбірейтін күн.
Бүгінгі тәуелсіздік тұғырының берік, еңсеміздің биік болуы да, еліміздің өркендеуі мен мемлекетіміздің гүлденуі де – осынау мерекенің жемісі.
Батыр ардагерлеріміз көрсеткен ерен ерліктің үлгісі жастарымыздың жүрегіне жігер ұялатып, наркескен намысын асқақтатсын!
***
Жеңіс күні құтты болсын! Аспанымыз ашық, бейбіт өміріміз мәнді де мағыналы болсын.
Бүгінгі ұрпақ аға буын-ардагерлер танытқан қаһармандық пен қайсарлықтан үлгі алып, бой түзейді. Осынау ерлікке толы Күн тарихымыздың мәңгілік ұмытылмас парағы болып қала бермек.
Баршаңыздың дендеріңізге саулық, шаңырақтарыңызға шаттық, бақ пен береке тілеймін!
***
9 мамырда аталатын Жеңіс Күні құтты болсын. Бұл күн – ең қымбатты, қуанышты да қайғылы, мәртебелі мейрам, халқымыздың ерлігі мен даңқының жарқын көрінісі. Қиындық пен қажырлы, табанды төзім жетелеген күннің жеңісті, жемісті шағы ұзағынан болсын.
***
1945 жыл. 9 мамыр..
Жылдан-жылға алыстап бара жатқан мерзім. Десе де, Ұлы Жеңістің анық бағасы мен маңызы біздің жадымызда мәңгі орын алған деуге болады. Ұлы Жеңіс тойы – бұрынғы кеңестік халықтардың ортақ, басты мерекелерінің бірі.
Жыл сайын мәңгілік алауы жанына Отан қорғаушыларын, батырларды еске алып, гүл шоқтарымен рахметін айта келгендер жиналады. Біздер де қадірлі ардагерлерге бейбіт өміріміз бен бақытты болашағымыз үшін алғысымызды білдіреміз!
***
Қадірлі соғыс ардагерлері, тыл еңбеккерлері!
Қасиетті де ұлы мереке қарсаңында Сіздерді Жеңіс күнімен шын жүректен құттықтаймын!
1945 жылдың 9 мамыры жұртшылық жадында біздің халқымыздың ерлік үлгісі, мұқалмас қажырлығы мен мызғымастығының символы болып келеді.
Отан қорғаушылар жасаған ерліктер мәңгілік және уақыт ағысымен жоғалып кетпейді. Сол бір қаһарлы соғыс жылдары алыстаған сайын оның маңызын біз ерекше ұғына түсудеміз. Сондықтан да халық ұзақ күткен Ұлы Жеңісті жақындатуда майданда да, тылда да жанқиярлықпен күреске түскендердің барлығы айрықша құрметке ие, қаза тапқандардың рухына тағзым етеміз.
Жасай беріңіздер!
***
Жеңісті жақындатқан ардагерлеріміздің даңқы аспандап, батыр бабаларымыз алып берген Жеңіс бүгінгі күні мәңгілік болсын. Ардагерлердің өрлігі мен кеңдігі бізді жігерлендіреді, жанымызға қуат береді, қиындықтарды жеңіп, алға ұмтылуымызға көмектеседі.
Қымбатты ардагерлер!
Сіздерге шын көңілден денсаулық, тіршіліктің ұзақ та жарқын, алаңсыз күндерін, жан шуағын, жақын адамдарыңыздың қамқорлығы мен ықыласын тілейміз.
***
Құрметті қазақстандықтар!
Ардақты ардагерлер!
Баршаңызды 9 мамыр – Ұлы жеңіс күнімен шын жүректен құттықтаймын!
Осы айтулы мерекенің әрқайсымыз үшін мәні айрықша. Өйткені біздің аталарымыз адамзат тарихындағы ең сұрапыл соғыста жеңіске жетті. Бір миллион екі жүз мыңнан астам қазақстандық майданға аттанып, оның жартысы елге оралған жоқ.
Ерен ерлігі үшін 500-ге тарта жерлесіміз Кеңес Одағының батыры атанды. Сондықтан 9 мамыр күні біз бүгінгі ұрпақтың бейбіт өмірі мен бақытты болашағы үшін жанын пида еткен ержүрек аталарымыздың рухына тағзым етеміз. Қажымас қайсарлықтың, ерен ерлік пен бекем бірліктің, Отанға деген сүйіспеншіліктің шынайы үлгісін паш еткен батырларымызды ұлықтаймыз.
Ұлы Отан соғысының ардагерлеріне мықты денсаулық, амандық, елімізге бақ-береке мен тыныштық тілеймін! Аспанымыз ашық болсын!
***
ЖЕҢІС КҮНІ - тарихы мен тағылымы бар мереке. Ол елге қуаныш әкелді, бірақ осы жолда көп отбасы қасірет шекті. Шейіт болғандардың жаны жәннаттан болсын! Әкелеріміздің әруағы қолдасын! Енді соғыс болмасын, ұрпағымызға бейбіт өмір бұйырсын! Өткеннен сабақ алу, ерлікті ұмытпау, дәріптеу - елдіктің, естіліктің белгісі. Жеңіс рухы дәйім бірге болсын!
Дархан МЫҢБАЙ
***
