Еліміздің Қаржы министрі Мәди Тәкиев онлайн-трансляция арқылы табыс табатын әртістер де салық төлеуге міндетті екенін айтты, деп Alash.kz ұлттық порталы Tengrinews.kz сайтына сілтеме жасап хабарлайды.
Үкіметтегі брифингте журналистер министрге соңғы уақытта танымал қазақ әншілерінің әлеуметтік желілерде өз концерттері мен тойларын жазылушыларға ақылы түрде тікелей эфирде көрсетіп жүргенін еске салды.
"Сәкен Майғазиев пен Қайрат Нұртас сияқты танымал әншілер өз концерттері мен тойларын оқырмандарына онлайн түрде сата бастады. Олар онлайн-концерттер мен тойлардан түскен табысқа салық төлеулері керек пе?" – деп сұрады журналистер.
Министрдің айтуынша, мұндай табыс кез келген өзге кіріс секілді міндетті түрде декларациялануы тиіс.
"Салық төлеуі керек. Біздің Конституциямыз бар. 34-бапқа сәйкес, әр азамат салық төлеуге міндетті. Егер қосымша табыс болса, оған да салық төленеді. Мысалы, әртістер той өткізеді, оны адамдар TikTok арқылы көреді. Жыл бойы алынған барлық табыс 2026 жылдың 31 наурызына дейін декларацияда көрсетілуі тиіс. Кейін 2026 жылдың 10 сәуіріне дейін 10 пайыз салық төлеу қажет", – деп түсіндірді қаржы министрі.
