Қазақстанның Халық әртісі, әнші Мақпал Жүнісова “Хабар” арнасының “Алғашқы” бағдарламасында қонақ болып, өзінің алғашқы махаббаты туралы айтып берді, деп жазады Alash.kz ұлттық порталы.
“Алғашқы махаббатымды әлі ұмытқан жоқпын. Үшінші сыныпта оқып жүргенімде, бесінші сыныпта Қанат Каргузов деген бала бар еді. Өте әдемі, сондай сұлу бала болатын. Бірақ ақыры сол махаббат маған бұйырмады.
Мен “Гүлдер” ансамбліне жаңадан келген кезде, ол әскерден оралды. Сол кезде маған Қабдеш деген досын жіберіпті. “Қанат сізге шұғыл келсін” деп жатыр дейді. Сонда мен:
“Оған бір жыл шыдасын деп жеткізші. Мен “Гүлдерге” жаңадан келдім. Кішкене болса да еңбек етейін. Сосын бір жылдан кейін жазда барамын. Үйленеміз. Бір жыл күтсін” деп сөз бердім.
“Сау бол, махаббат” деп шыдамады ғой “Кетсең де шалғай” деген әнді сол Қанатқа арнап, жылап айтқанмын. Ол кісі марқұм болып кетті.
Бес жыл бұрын маған Қанаттың баласы хабарласты. “Мақпал апа, мен Қанат Каргузовтың баласы едім” деді. “Өлә” деп, жүрегім дір ете түсті. “Иә, не болды, айналайын?” дедім. “Әкемнің аманаты еді. Мен қайтыс болғанда Мақпалға айт деп өсиет қалдырған” деді.
Соны баласы маған жеткізіп тұр ғой. Құдай-ай, десейші… Әлі күнге дейін ол кісінің альбомында менің суреттерім мен хаттарым сақтаулы”, - деді Мақпал Жүнісова.
