Әлеуметтік желіде өзінің тренд видеоларымен танымал болған мектеп директоры Ақмоншақ Нұртаза оқырмандарының сұрағына жауап берді, деп жазады Alash.kz ұлттық порталы.
Мектеп директоры оқырманының: “Сіз мектептен кеткен жоқсыз деп сенемін. Кетпеңізші” деген сауалына былай жауап берді:
“Қалай ойлайсыз? Кетпеңіз, жаңашылдықтың басы. Мектеп сіздікі емес, босатқаныңыз дұрыс”,- деп оқырмандарынан таңдау жасауды сұрады.
Естеріңізге сала кетейік, бұған дейін мектеп директоры өзін қолдап жатқан оқырмандарына алғысын білдірген болатын.
"Мыңдаған адамның қолдауын сезініп, ұйықтай алмадым. Мен сіздермен біргемін", – деп жазды Ақмоншақ Нұртаза.
Сондай-ақ мектеп директоры Астана қаласындағы №58 мектеп-гимназиясының директоры қызметінен кеткенін мәлімдеген еді.
"Бәрін тоқтаттым. Мектеп. Қызмет. Әлеуметтік желі. Келесі қадам?" – деп жазды Ақмоншақ Нұртаза.
Кейін мектеп директоры әлеуметтік желідегі белсенділігін тоқтатпайтынын айтып, қуанышты жаңалығын бөлісті.
“Кішкене үзіліс алып, парақшамда не жазатыным туралы ойланып жүр едім…
Қазір бұрынғыдай белсенді емеспін, бірақ алда бұл парақшада басқаша форматтағы, жаңа бағыттағы контент болады.
Өйткені мен бұл парақшаға жай ғана контент салып, оқырман санын көбейтіп, тренд қуып отыратын блогер болғым келмейді.
Мен үшін бұл – миссиясы бар парақша.
Иә, дәл солай. Өз миссиямды тапқан сияқтымын.
Мен ұстазды шабыттандыратын, оқушыны еститін, ата-анаға бағыт беретін, қазіргі буынмен байланыс орната алатын парақша жүргізгім келеді.
Біраз уақыт бұрын барлығы сол қалпында болғанымен, менің ішкі дүнием өзгеріп кетті.
Сол себепті, енді парақшамда жаңа дүниелер басталмақ.
Күтемін”,- деп жазды жаңашыл директор.
