Айтыскер ақын Мұхамеджан Тазабек журналист Жанар Байсеміздің YouTube-арнасына сұхбат беріп, экс-президент Нұрсұлтан Назарбаевтың жиені, марқұм Айсұлтан Назарбаев жайлы естелігін бөлісті, деп жазады Alash.kz ұлттық порталы.
“Мысалы, Рахат Әлиевті қарасаң, көп нәрсеге бірден қол жеткізді ғой. Баласы Айсұлтан бауырыммен жақсы араластым. Көп нәрсеге бірден қол жеткізді. Мүмкін еңбексіз де келген нәрселер бар шығар. Бірақ, мен таныған, мен көрген Айсұлтан - ақжүрек, өте керемет жігіт болып көрінді. Өйткені, Умраға барғысы келді. Ниеттенді. Қасында болдым. Меккеде болдық. Мәдинада болдық. Әңгімелесіп, бір бөлмеде жаттық. Бір ұшақпен ұштық дегендей…
Айсұлтан қайтыс болғанда, өзім осы оқиғаның бәрін Facebook-ке жазғанмын. Кейін анасы мені үйіне шақырып, Айсұлтан туралы сұрады. “Сен араластың ғой. Қандай жақсы нәрселер айтасың?” деді. Енді көңіліне қуаныш, демеу тапқысы келді. Сонда да Айсұлтанмен бірге өткен сол бір күндер жайлы анасына айтып бердім.
Кейін біз Умраға барып келгеннен кейін Айсұлтан тіптен туған ағасындай көріп, бірге шай ішпесек, бірге тамақ ішпесек жүре алмайтындай айлар да өтті басымыздан… Кейін оны аяқ астынан таппай қалдым. Басқа ортада болды ма, шетелге кетті ме, таппадым. Содан байланыс үзілді. Бірақ мен көрген Айсұлтан - ақжүрек, балаша ешкім туралы жаман ойламайтын сондай бір ізгі бала болып көрінген. Өмірінің соңғы сәттерінде қасында болмасын ештеңе айта алмаймын”,- деді Мұхамеджан Тазабек.
