Қырғызстанның Еңбек, әлеуметтік қамсыздандыру және миграция министрлігі “көпбалалы отбасыларға берілетін жәрдемақы туралы” президент жарлығының жобасын қоғам талқылауына ұсынды, деп жазады Alash.kz.
Құжатқа сәйкес, 2026 жылдың 1 қаңтарынан бастап таулы және шалғай аймақтарда тұратын көпбалалы аналарға арналған(үлкен қалалар мен облыс орталықтары жатпайды) “Бала Береке” атты жаңа бір реттік төлем келесі мөлшерде енгізіледі:
- 4-бала – 400 000 сом (2 056 000 ₸)
- 5-бала – 600 000 сом (3 084 000 ₸)
- 6-бала – 800 000 сом (4 112 000 ₸)
- 7-бала – 1 000 000 сом (5 140 000 ₸)
- 8-бала – 1 200 000 сом (6 168 000 ₸)
- 9-бала – 1 500 000 сом (7 710 000 ₸)
- 10-бала және одан көп – 2 000 000 сом (10 280 000 ₸)
Енгізілмек болып отырған бастама, бала бір жасқа толғанда беріледі. Айта кету керек, Қырғызстанда ай сайынғы жөргекпұл қарастырылмаған. Бауырлас елде бұған дейін 4000 сом көлемінде бір реттік жәрдемақы беріліп келген.
Қазақстанда бала санына байланысты туған кезде бір реттік жәрдемақы және нәресте 1,5 жасқа дейінгі ай сайынғы жөргек пұл тұрақты түрде, аудан-қалаға қарамастан түсіп тұрады.
Бала тууына байланысты бір реттік мемлекеттік жәрдемақы:
- 1,2,3-бала – 38 АЕК (149 416 ₸)
- 4-бала және одан көп – 63 АЕК (247 716 ₸)
Бала 1,5 жасқа толғанға дейін ай сайынғы күтім жәрдемақысы (жұмыс істемейтін әйелдерге):
- 1-бала – 5,76 АЕК (22 648 ₸)
- 2-бала – 6,81 АЕК (26 777 ₸)
- 3-бала – 7,85 АЕК (30 866 ₸)
- 4-бала және одан көп – 8,90 АЕК (34 995 ₸)
Егер ана міндетті әлеуметтік сақтандыру жүйесіне қатысушы болса, оған бала күтіміне төленетін әлеуметтік төлем соңғы екі жылдағы орташа айлық табысының 40%-ы көлемінде төленеді.
Екі елдің демографиялық өсімі мен георафиялық жағдайларын ескере отырып, халықтың өз әлеуетіне сай жобаларының бар екенін атап айтқан жөн. Себебі, экономикалық тұрғыда бауырлас елдердің әлеуметтік жағдайы әртүрлі факторларға байланысты салыстыруға келмейді.
