Каспий теңізінің солтүстік бөлігінде жаңа табиғи нысан тіркелді. Ресей ғылым академиясының Океанология институтының мәліметінше, Малый Жемчужный аралынан оңтүстік-батысқа қарай шамамен 30 шақырым жерде жаңа арал пайда болған. Бұл туралы Alash.kz хабарлады.
Океанология институтының мамандары арнайы экспедиция ұйымдастырып, аталған аумаққа жеткенімен, судың таяздығы мен қолайсыз ауа райы салдарынан тікелей зерттеу жүргізе алмаған. Дегенмен дрон арқылы түсірілген бейнематериалдар жаңа құрлық аумағының бар екенін растаған.
Ғалымдардың айтуынша, бұл - Каспий теңізі деңгейінің төмендеп келе жатқанының нақты көрінісі. Сарапшылардың болжамына сәйкес, алдағы жылдары теңіз тартылуы жалғасып, жаңадан пайда болған аралдың аумағы кеңейуі мүмкін.
“Жаңа аралдың пайда болуы - Каспийдің тайызданып бара жатқанының кезекті айғағы. Тереңдік азайған сайын жаз мезгілінде су қатты қызып, көптеген аймақтар су жануарларының тіршілігіне жарамсыз болып қалады. Егер бұл үдеріс тоқтамаса, балық шаруашылығы үшін маңызды аумақтар жойылып, балықтардың мекендеу орындары оңтүстікке ығысады. Мұның салдары бүкіл аймақтың экожүйесіне әсер етуі мүмкін” делінген институт таратқан мәлімдемеде.
Ғалымдар бұл құбылысты Каспий маңындағы елдер үшін ескерту ретінде қабылдап, шұғыл экологиялық мониторинг жүргізу қажеттігін алға тартып отыр.
