Премьер министрдің орынбасары Серік Жұманғарин Сенат отырысында “Жаңбыр адамға” қатысты тілші сұрағына жауап беру барысында мұндай жобаға сенбейтінін мәлімдеді, деп хабарлайды Alash.kz.
Алтай Айнабек - былтырғы жылы өзінің елде жоқ құрылғысымен бұлтты қоюлатып, Арал аспанына жаңбыр жауғызған өнертапқыш. Алайда, елімізде қаржылық қолдау болмағандықтан, отандасымыз Өзбекстанға барып, өз өнімі арқылы қуаңшылықпен күресіп жүрген көрінеді. Instagram желісіндегі @qrnews.kz редакциясы жариялағандай, “Алтай Айнабектің құрылғысы өзіміздің оңтүстік өлкені суғаруға қажет емес пе?” деген сұраққа Серік Жұманғарин өзінің бұл ғалым туралы мүлдем бейхабар екенін айтқан:
Шынымды айтсам, бұл жаңалықты бірінші естіп тұрмын. Сол үшін нақты ештеңе айта алмаймын…
Артынша, премьер министрдің орынбасары қолдан жаңбыр жауғызуға сенбейтінін айтып, “Тасаттық” салтын мысалға келтірді:
“Менің бір естігенім бар. Депутаттар жиналып, Маңғыстауда жиналып қазақтың дәстүрін өткізген. Жаңбыр шақырамыз деп, бір аппаратты сатып алған. Соңында ол қылмыстық істің қозғалуымен аяқталған. Сондықтан, ондай құрылғыларды дұрыстап тексеру керек. Жалпы айтқанда сенбеймін” деп өз сөзін түйіндеді.
