Елімізде бала туу көрсеткіші төмендеген. Бұл мәселеге журналист Ләйлә Сұлтанқызы алаңдаушылық білдірді. Оның айтуынша, балалы болудан саналы түрде бас тартатындардың саны жылдан-жылға артып барады, деп жазады Alash.KZ..
«Балалы болуға асықпайтындар қатары жылдан жылға көбейіп келеді. Неге? Былтыр алғашқы 3 ай мен биылғы 3 айды салыстырсақ, туу көрсеткіші 14%-ға төмендеді. Себебі саналуан болуы мүмкін, бірақ мұндай төменгі көрсеткіш соңғы рет 2014 жылы болған. Ары қарай осылай жалғаса берсе, жағдай қалай болар екен?
Баланың туылуының күрт төмендеуінен кейбір мемлекеттерде балабақша, мектептер жабылып жатқанын еститін едік, бізге де сондай қауіп төнбей ме екен?
Неге әке, ана болудан саналы түрде бас тартады екен? Тек қана қаржының жетіспеуі ме? Әй, қайдам олай емес-ау», — деп жазды ол.
Тележүргізушінің оқырмандары мен желі қолданушыларының басым бөлігі жастардың мұндай шешім қабылдауына қаржылық жағдайдың әсер еткенін айтады.
«Өзім 30-дамын. Бірақ бала туғым келмейді. Кредит, ипотека деп өзімді зорға асырап жүрмін», «Қазір үйірмесі, тіл курстары, қажеттіліктері бар, бала туу көп ақшаны талап етеді», «Қазір ер адамдар жауапкершілікті сезінбейтін болып кеткен. Әйелдер қашанғы баланы да, күйеуді де сүйресін», «Пәтерде жүріп бала туғымыз келмейді», — деп жазды олар.
