Маңғыстау облысы Ақшұқыр ауылының әкімі Еркебұлан Қуатұлы оқушылармен кездесу кезінде бір балақай әкімнен ойын алаңын салып беруді сұрады, деп жазады Alash.KZ.
Жүрек толқытатын оқиға былай болған:
Оқушылармен еркін әңгіме барысында бір бала орнынан тұрып, барша ауыл балаларының тілегін жеткізгендей болады.
«Біздің көшемізге ойын алаңын салып бере аласыз ба?» — деп сұрады оқушы.
Бұл сұрақ әкімді ғана емес, сол сәтке куә болған көпшілікті де толқытты. Әкім баланың өтінішіне байыппен қарап:
«Ауылда балаларға арналған ойын алаңдары мен демалыс саябағын салу жоспарымызда бар. Бұл мәселе назарымызда», — деп жауап берді.
Бұл әсерлі сәт бейнетаспаға түсіп, көп ұзамай әлеуметтік желіде тарап кетті. Қолданушылар баланың шынайы да батыл әрекетіне сүйсініп, пікір қалдырды.
Көпшілік мұндай шынайы үндеулер билікке жетуі керек деген ой білдіруде.
Балақайдың бір ауыз сөзі қоғам назарын ауылдағы балалардың жағдайына аударды. Бұл — үлкендердің де, биліктің де назарында болуға тиіс маңызды мәселе.
Әкім алдағы уақытта ауылда ойын алаңдары мен парк салынатынын айтты.
