Павлодарда 9 мамыр Жеңіс күнінің қарсаңында Жеңіс саябағында мектеп оқушылары билеген би қоғамда үлкен дау туғызды, деп жазады Alash.KZ.
Видеода төрт қыз ескерткіштің артқы жағында билеп жатқан сәті көрінеді. Бейнежазбаға «Жеңіс саябағын қорлап жатырмыз» деген арандатушы жазу қойылған. Әлеуметтік желі қолданушылары бұл әрекетті Екінші дүниежүзілік соғыста қаза тапқандардың рухына құрметсіздік деп қабылдап, кінәлілерді жазалауды талап етті.
Құқық қорғау органдары оқиғаға қатысы бар барлық қыздарды тез арада анықтап, оларды ата-аналарымен бірге полиция бөлімшесіне жеткізді.
Іс материалдары шешім қабылдау үшін сотқа жолданып, кәмелетке толмағандар ісі жөніндегі комиссияға да хабар берілді.
Бейне TikTok желісінде жарияланғаны анықталды. Би билегендер – қалалық би студиясының тәрбиеленушілері. Олардың үшеуі – мектеп оқушысы, біреуі – колледж студенті, екеуі 16 жаста.
Балалар омбудсмені Сауле Шакеневаның айтуынша, екі қызға тікелей жауапкершілік жүктеліп, оларға ұсақ бұзақылық бойынша әкімшілік хаттамалар толтырылған. Ал 16 жасқа толмағандар үшін жауапкершілікті ата-аналары көтереді – олар жайсыз тәрбие бергені үшін жауапқа тартылып, оларға да әкімшілік хаттама жасалған.
Барлық кәмелетке толмағандар оқитын оқу орындарында арнайы бақылауға алынады.
