Көкшетау қаласының 41 жастағы тұрғыны Жанболат Кенжахметовтың жоғалуына байланысты полиция оның қайда екенін анықтау үшін барлық мүмкін шараларды қабылдап жатыр, деп хабарлайды ALASH.KZ ҚР ІІМ-ге сілтеме жасап.
11 мамыр күні ер адамның қарт әкесі оның жоғалғаны туралы арыз берген.
Оның айтуынша, 8 мамыр күні шамамен сағат 14:30-да ұлы жұмыстан кейін әріптесімен бірге автокөлік қалашығына, «Рома» дүкені жаққа кеткен. Содан бері ол туралы еш хабар жоқ.
Жоғалған адамның белгілері:
- Жасы: шамамен 41-де,
- Бойы: 170–175 см,
- Шашы: қара,
- Көзі: қоңыр.
Киімі: сұр жилет, сұр шалбар, қара аяқ киім.
«Арыз түскен бойда жедел іздестіру жұмыстары басталды. Іздеуге барлық полиция бөлімшелері бағытталып, қосымша күштер жұмылдырылды. Жедел-іздестіру шаралары жүргізілуде: туыстарынан, әріптестері мен таныстарынан сұрақ-жауап алынып жатыр, бейнебақылау камераларының (Жедел басқару орталығы, дүкендер, мектеп-интернат) жазбалары қаралуда, қонақүйлер, жекеменшік үйлер, жалдамалы пәтерлер тексерілуде, иесіз қалған және пайдаланылмайтын ғимараттар араланып, автокөлік қалашығы маңында болған куәгерлер анықталуда», – делінген полиция хабарламасында.
