Павлодарда туған анасы бесінші қабаттан лақтырған екі баланың бірі қайтыс болды, деп жазады Alash.kz.
Бұл туралы Павлодар облысының бала құқықтары жөніндегі уәкілі Сәуле Шәкенова мәлімдеді.
“Өкінішке қарай, дәрігерлер қанша тырысқанымен, кіші баланың жүрегі тоқтап қалды”, – деді ол.
Ақпаратты Павлодар облыстық балалар ауруханасы да растады. Мамандар екі күн бойы баланың өмірі үшін күрескен.
“1 тамыз күні баланың жағдайы (2024 жылы туған) өте ауыр, әрі тұрақсыз болды. Кешке қарай жағдайы күрт нашарлады. Сағат 20:10-да жүрек қызметі тоқтап, 20:40-та өлімі тіркелді”, – деп хабарлады медициналық мекеме.
Кішкентай ұл бала ауруханаға клиникалық өлім жағдайында жеткізілген. Дәрігерлер алғашқы кезде оның жүрек соғысын қалпына келтіре алған.
Сол күні кешке баланың жағдайы қайта нашарлап, ішкі қан кету салдарынан зақымдалған сол жақ бүйрегін алып тастауға тура келген. Отадан кейін жүрегі тағы да тоқтағанымен, дәрігерлер оны қайта соқтыра алған еді.
Еске салсақ, кеше Павлодарда келіншек екі баласын терезеден лақтырып жіберген еді.
