Елордада ер адам өз-өзіне ие бола алмай, қолындағы өткір затпен жасөспірімдер тобына қоқан-лоққы көрсеткен. Оқиға кешкі уақытта Есіл өзенінің жағалауында, қонақ үйлердің бірінің жанында болған, деп жазады Alash.KZ.
Қорыққан жасөспірімдер көмек сұрап, сол маңайда патрульде жүрген Ұлттық ұлан сарбаздары — Абзал Ерғали мен Алихан Аманға жүгінген. Гвардияшылар жедел әрекет етіп, агрессивті ер адамды дереу ұстап алған.
«Балалар қатты қорқып қалған, жағдайдың күрделі екені бірден байқалды — бәрі секундтармен есептелді. Ер адам өткір затпен қолын сермеп, түрлі қорқытулар айтты. Біз оның назарын басқа жаққа аударып, нұсқаулыққа сай әрекет еттік: қаруын тартып алып, қолға түсірдік», — деді қатардағы жауынгер Ерғали.
Қазір құқық бұзушы полицияға тапсырылды. Тергеу амалдары жүргізілуде. Жасөспірімдер зардап шеккен жоқ.
