Қазақстанда қылмыстық орта өкілдерімен байланысы бар күзет фирмасының заңсыз әрекеті тоқтатылды, деп хабарлайды ALASH.KZ.
Бұл туралы полиция департаменті мәлім етті.
Полицияның мәліметінше, қылмыстық топ өкілдері шағын және орта бизнес нысандарын толық бақылауға алу мақсатында ойын-сауық мекемелерінің басшылары мен қызметкерлеріне физикалық және моральдық қысым көрсетіп, заңсыз әрекеттер жасаған.
Содан кейін олар кәсіпкерлік нысандарды күшпен иемденіп, сол жерде “қауіпсіздік” қызметін жүзеге асырған.
“Күдіктілерді ұстау операциясы Алматы қаласы, Жетісу, Түркістан, Маңғыстау, Жамбыл және Алматы облыстарында жүргізілді. Жалпы саны 20 қылмыстық топ мүшесі ұсталды. 40-тан астам тінту жұмыстары жүргізіліп, жеті бірлік атыс қаруы, оның ішінде үш кесілген мылтық, Макаров тапаншасы, Калашников автоматы және 100-ден астам оқ-дәрі тәркіленді”, — деп мәлімдеді ҚР ІІМ Ұйымдасқан қылмысқа қарсы күрес департаментінің өкілі Қуаныш Алпыс.
Қылмыстық топ мүшелеріне қатысты бұзақылық, бопсалау, адам ұрлау, өз бетінше билік ету және денсаулыққа қасақана зиян келтіру фактілері бойынша қылмыстық істер тергелуде.
“Топтың басшысы мен мүшелеріне қатысты ұйымдасқан қылмыстық топ құру, басқару және оған қатысу баптары бойынша сотқа дейінгі тергеу басталды. Сондай-ақ күдіктілердің басқа да ұқсас қылмыстарға қатысы бар-жоғы тексерілуде”, – деп қосты полиция өкілдері.
