Батыс Қазақстан облысында киік популяциясын реттеу жұмыстары басталды. Аң ату науқаны 30 қарашаға дейін жалғасады. Бұл шара табиғи тепе-теңдікті сақтау, жайылымдардың тозуын тежеу және ауыл шаруашылығы алқаптарын қорғау мақсатында қолға алынған, деп мәлімдейді Alash.kz.
Облыстық әкімдіктің хабарлауынша, өңірде киік саны 2,3 миллион басқа жеткен. Ғалымдар дайындаған биологиялық негіздемеге сәйкес, олардың 20 пайызына дейін, яғни 460 мың басқа дейін атуға рұқсат берілген. Бұл көрсеткіш табиғи балансқа зиян келтірмейтін шек ретінде белгіленген.
Киік санын реттеу жұмыстарына 40-қа жуық маман тартылып, 4 арнайы бригада жасақталған. Әр топқа үш техникадан бөлініп, барлығы 12 көлік жұмылдырылған.
Атылған киіктердің еті арнайы белгіленген ет өңдеу кәсіпорындарына жеткізіледі.
Экологтар мен ғалымдар бұл шешімді ғылыми зерттеулер мен тәжірибелерге сүйене отырып қабылдағанын алға тартады. Киіктердің шамадан тыс көбеюі шөптесін жамылғының азаюына, үй жануарларына азықтың жетіспеушілігіне, сондай-ақ ауыл шаруашылығы дақылдарының жойылуына алып келуі мүмкін екенін айтады.
