Әзербайжанның Хачмаз ауданында 15 жасар жеткіншек өз анасын өлтірді деген күдікке ілінді. Қайғылы оқиға туралы Alash.kz ұлттық порталы хабарлайды.
Қолын қанға малған жасөспірім жуырда ғана 9-сыныпты аяқтаған. Қазіргі уақытта ол полиция тарапынан ұсталып, анасын өлтірді деген күдікпен тергеліп жатыр. Аталған факті бойынша Хачмаз аудандық прокуратурасы қылмыстық іс қозғап, тергеу амалдары жүргізілуде.
Қаза тапқан Кифаят Лятифованың туысы Джейхун Мустафаевтың айтуынша, қылмыс болған сәтте үйде тек анасы мен ұлы ғана болған. Жасөспірім анасынан телефонын сұраған, бірақ анасы рұқсат бермеген. Ашуға булыққан жеткіншек анасын пышақтаған.
“Оқиғаны естігенде бәріміз есеңгіреп қалдық. Ол мұндай қадамға барады деп ойлаған жоқпыз. Бұл мүлдем басқа бала сияқты болды” деді Джейхун Мустафаев.
Марқұмның әпкесі Мехпара Меликова да бұл жайтқа пікір білдіріп, олардың арасындағы қарым-қатынас өте жақын болғанын, денсаулығындағы кәнараттың болғанын айтты:
“Сіңлім баласын ешқашан жалғыз қалдырмайтын. Ол ұйықтағанда да анасынан айырылғысы келмейтін. Баланың денсаулығында біраз қиындықтар бар еді. Сіңлім оның денсаулығы үшін бірнеше мәрте ота жасатты”.
