Астанада экс-дипломат Сәкен Мамаш 10 жыл бойы жұбайына тұрмыстық зорлық-зомбылық көрсеткені үшін 6 жылға сотталды, деп хабарлайды Alash.kz.
БАӘ-дегі Қазақстан елшілігінің экс-кеңесшісі Сәкен Мамаш бұрынғы әйелі Карина Госманға қатысты көрсеткен тұрмыстық зорлық-зомбылық ісі бойынша 6 жылға бас бостандығынан айырылды. Үкімді Астананың Қылмыстық істер жөніндегі ауданаралық соты жариялады.
Судья Артур Абдыханов мәлімдегендей, Сәкен Мамаш Қылмыстық кодекстің 110-бабы 2-бөлігі бойынша кінәлі деп танылған. Жазасын орташа қауіпсіздік мекемесінде өтейтін болады. Прокурор сұраған 6 жыл бас бостандығынан айырк жазасын арқалады.
Карина Госман 2024 жылдың мамырында БАӘ-нен елге оралған. Ол сол елде елшілікте кеңесші болған күйеуінен он жыл бойы жүйелі түрде қысым мен зорлық көргенін мәлімдеген. Әйелдің Қазақстанға қайта оралуына Сыртқы істер министрлігі мен “#НеМолчи.kz” қоры көмектескен.
Карина біраз уақыт бойы Астанадағы «Қорғау» дағдарыс орталығында тұрған. Ал 10 мамырда Мамашқа қатысты қылмыстық іс қозғалып, ол дипломатиялық қызметінен шеттетілді. Қазан айында экс-жұбайымен ресми ажырасып, Мамаш деген тектен бас тартты, бірақ кейбір құжаттарда бұл тегі әлі де сақталып отыр.
