Астанада түнде болған өрт салдарынан “BIG Шанхай” сауда үйінің қабат аралық жабындысы опырылып түсті. Үш Төтенше жағдай қызметкері жараланды, деп жазады Alash.kz.
Өрт 18 шілде күні таңғы сағат 07:10-да оқшауланды. Өртті сөндіруге Төтенше жағдайлар департаментінің 100 қызметкері мен 60 техника бірлігі жұмылдырылды.
Әртүрлі жарақат алған екі құтқарушы Травматология және ортопедия ұлттық ғылыми орталығына жеткізілді, ал үшіншісі №1 көпбейінді қалалық ауруханаға көгерген жарақаттармен түсті. Үшеуінің де жағдайы - тұрақты, орташа ауыр деңгейде.
«BIG Шанхай» сауда үйінің жалпы аумағы - 40 мың шаршы метр. ТЖД мәліметінше, өрт туралы кеш хабарлануына байланысты қызыл жалын бүкіл ғимарат аумағын шарпыған. Тілсіз жаумен күресті қиындатқан жайттардың бірі - нысан ішіндегі жанғыш материалдардың көптігі.
Әкімшілік тарапынан өрт туралы хабарлама түспеген. Өртті бірінші және үшінші қабат терезелерінен шыққан қою қара түтінді байқаған өрт сөндіру бөлімінің қызметкерлері анықтады. Апаттың неден орын алғаны тергеу барысында белгілі болады.
