Перизат Қайрат ісі бойынша өтіп жатқан сотта оның Толғанай Боранқұл есімді құрбысымен алмасқан хаттан үзінді оқылды. Айыпталушы диплом “жасатып беру” үшін көмек сұраған, деп жазады Alash.KZ.
Ол мұндай әңгіме болғанын растады. Айтуынша, бұл шамамен екі жыл бұрын болған.
“Есімде, ол кезде ол министрдің көмекшісі болып жұмысқа орналасуды ойлап жүрген еді”, – деді Перизаттың құрбысы.
Сотта қыздан “замутить диплом” деген сөзді қалай түсінгені сұралды.
“Менің түсінігімде, "замутить" деген – сатып алу немесе сырттай оқу арқылы диплом алу, мемлекеттік мекемеде жұмыс істеу үшін”, – деді Толғанай Боранқұл.
Оған Перизат Қайрат шетелде оқығанын айтып, дипломын Қазақстанда қалай растатуға болатынын сұрағанын жеткізді. Боранқұл да Перизат бұл мәселе бойынша одан кеңес сұрағанын растады.
“Мен де шетелде оқыдым. Дипломды Қазақстанда нострификациядан өткізу керек, мен де сондай процедурадан өттім. Ол осы жайында менен сұрады. Кейін қалай болатынын суретке түсіріп көрсетуімді сұрады. Мен оған фото немесе сканерленген нұсқасын жібердім”, – деді Боранқұл.
