Перизат Қайрат пен оның анасы Гайни Алашбаеваға қатысты сот процесі барысында, Қазақстанның екі ірі банкі "Biz Birgemiz" қорына шамамен бір миллиард теңге қаржы салғаны белгілі болды, деп хабарлайды Alash.kz.
Kaspi Bank атынан сөз алған Айдар Ксембайдың айтуынша, банк қордың шотына 620 млн теңге аударған. Бұл қаражат су тасқынынан зардап шеккен қазақстандықтарға көмек көрсету үшін бөлінген.
"2024 жылғы 5 сәуірде Перизат Қайрат бізге 120 млн теңге көлемінде халыққа көмек көрсету туралы өтінішпен хат жолдады. 8 сәуірде тағы бір хат келіп түсті, онда қосымша 500 млн теңге сұралған. Хаттарды қарап, біз жалпы 620 млн теңгені "Biz Birgemiz" қоғамдық қорының шотына аудардық.
1 шілдеде Перизат Қайраттан алғыс хаты келді, онда қаражаттың көп бөлігі қайықтар, генераторлар, қаптар секілді заттарды алуға жұмсалғаны айтылды. Қалғаны – азық-түлік пен көлік қызметтеріне.
Алайда қазір анықталғандай, бұл қаражат қор басшысы тарапынан жымқырылған. Қазіргі уақытта банкке келтірілген зиян – 620 млн теңге", – деді заңгер Айдар Ксембай.
2025 жылғы 15 шілдеде өткен екінші сот отырысында Jusan Bank (қазіргі атауы – Alatau City Bank) өкілі де мәлімдеме жасады. Оның айтуынша, бұл банк те "Biz Birgemiz" қорына 300 млн теңге аударған.
Бұл қаржы да су тасқынынан зардап шеккен тұрғындарға көмектесу үшін бөлінген.
Екі банк те өз қаржысын қайтаруды талап етіп отыр. Олар басқа да жапа шеккендер сияқты, қордың әлеуметтік желілердегі жарнамасына сенгендерін айтады.
