Айтыскер ақын Мұхамеджан Тазабек журналист Жанар Байсеміздің YouTube-арнасына сұхбат беріп, экс-президент Нұрсұлтан Назарбаев жайлы көзқарасын айтты, деп жазады Alash.kz ұлттық порталы.
“Менің көзқарасым Назарбаевқа, Тоқаевқа немесе басқа патшаға байланысты емес. Билікке құндылық тұрғысынан қараймын.
“Тұңғыш президент” деген мынадай нәрсе сияқты… Үйде тұңғыш бала туады ғой, сонда атасы мен әжесі еркелетіп, басқа балаларға қарағанда тентектеу болады. Тура сол сияқты тұңғыш президент дегенге де кең билік беріледі. Яғни бір қолына билікті алады. Қаншама шаруа шешіледі.
Сол шаруа шешілген кезде өзі де сұхбаттарында айтады ғой… “Қате шешімдер болды, кадрлық мәселеде қателіктер жіберілді” дейді. Сосын өңкей жоқшылық өтіп кеткен кеңес дәуірінің тар есігінен шыққаннан кейін жұрттың барлығы молшылыққа он саусағын салып, жан-жақтан кірісті ғой. Ол тек қана бір адамға байланысты емес.
Жалпы қоғамның ындыны сондай болды ғой. Ешкім ешкімді аяған жоқ. “Мен” деген жігіттердің қарақшы болып кетті.“Мен” деген шенеуніктер жекешелендіру кезінде мемлекеттің мүлкі деп қараған жоқ. Президентке қасиетсіз ұсыныстар айтып барған адамдар көп болды.
Сырттан да сол мүмкіндікті пайдаланып, “мына мемлекетке қалсын” деп емес, “бүтіндей біз алып кетейік” деген ұсыныстар болды. Ол кездегі қателіктер бір адамнан болған жоқ. Өзі бір адаммен байланыстырылып айтылады. Бірақ түпкі себеп бір адаммен байланыспайды. Патшаға “свитасы” орта қалыптастырады дейді ғой. “Төменгі саналар адамдар жайында талқылайды. Орташа санадағы адамдар оқиғаларды талқылайды. Ал енді биік санадағы адамдар құндылықтар жайлы айтады” дейді. Сондықтан шамам келгенше кішкене биігіреу ойлауға тырысамын”,- деді Мұхамеджан Тазабек.
