Қырғызстанның кәсіпкер қызы Рысгүл Акимжанова Эверест шыңын бағындырды, деп жазады Alash.KZ.
Бұл туралы оның жұбайы, Жогорку Кеңеш депутаты Эмил Токтошев мәлімдеді.
Жолдасының айтуынша, Рысгүл Акимжанова 27 мамыр күні Непал уақыты бойынша таңғы 04:40-та әлемдегі ең биік тау — 8848 метр биіктікте орналасқан Эверест шыңына сәтті шығып, Қырғызстанның туын желбіреткен.
«Қазір Рысгүл төменгі лагерьге қарай түсіп келе жатыр, аман-есен оралуын тілейміз. Қолдау көрсетіп, ақ тілектерін білдірген барлық азаматтарға жүрек жарды алғысымызды айтамыз», — деді ол.
Еске сала кетсек, өткен аптада Эверестке аттанған Рысгүл Акимжанова 8400 метр биіктіктен кері қайтуға мәжбүр болған еді. Бұған шыңға шыққанда алып барған оттегі баллонының жетіспеуі себеп болған.
Рысгүл Қырғызстанның туын Эверест шыңында желбіреткен екінші әйел. Бұған дейін, 11 мамыр күні Асел Байбагышева Эверестке сәтті шыққан болатын.
