Алматы облысы, Талғар ауданына қарасты Дәулет ауылындағы амбулаторияда бір күнде бірнеше медицина қызметкері жұмыстан шығып кеткен, деп жазады Alash.KZ.
Ауыл тұрғындары алаңдаулы: қазіргі уақытта емдеу мекемесінде жергілікті мамандардан тек зейнеткер-дәрігер мен санитарка ғана қалған.
Ауылда шамамен 6 мыңға жуық халық тұрады, бірақ олардың тек үштен бірі ғана осы емханаға тіркелген.
16 мамыр күні үш медбике мен бір техникалық қызметкер өз еріктерімен жұмыстан кеткен. Қазір уақытша көмек ретінде көрші Жаңалық ауылынан бірнеше медбике шақырылыпты.
Мамандардың айтуынша, бұл жағдайдың себебі тек жалақыда емес, негізгі себеп — ұжым ішіндегі ұзақ уақыттан бері жалғасып келе жатқан кикілжің.
Бір жарым жыл бойы ұжымда шиеленіс күшейіп отырған. Жағдай әсіресе тәжірибелі медбике Айгерім Көмекбайға негізсіз сөгіс берілгеннен кейін ушыққан. Айгерім – 20 жылдан астам тәжірибесі бар маман. Ол сөгіс туралы ескертілмеген, әрі өзі қатыспаған жағдайда берілген. Осы әділетсіздікке қарсы наразылық ретінде үш қызметкер бірден жұмыстан кетуге шешім қабылдаған.
Айгерім Көмекбайдың айтуынша, басты мәселе — жалпы тәжірибе дәрігері Тамара Егізбекқызының медбикелерге деген қарым-қатынасы. Ол өз міндетін дұрыс атқармаған және медбикелерге айқайлап, қысым көрсеткен.
«Мені сондай күйге түсірді, қан қысымым қатты көтеріліп, мұрнымнан қан кеткен жағдайлар болды. Үш күнге ауруханаға берілген анықтамамды автоматты түрде жарамсыз деп тапты», — дейді аға медбике Айгерім.
Тамара Егізбекқызына қатысты басқа да айыптаулар айтылуда. Айгерім оның кәсіби біліктілігіне күмән келтіреді: бір жағдайды мысалға келтіріп, дәрігердің салғырттығынан бір баланың мүгедек болып қалғанын айтты.
