Танымал блогер Зарина Сапар жүргізуші Жанерке Сейфуллинаға берген сұхбатында бұрынғы күйеуі журналист Айдос Игіліковтен көрген зорлық-зомбылығын айтып, сырын ақтарды, деп хабарлайды ALASH.KZ Azattyq Rýhy сайтына сілтеп.
Оның айтуынша, «Қалаулым» бағдарламасында қасында отырған қатысушы, журналист Айдос Игіліков алып қашып кеткен.
«Айдоспен бірге тұрып тапқан ақшам болатын. Анама көмек болсыншы деп берген едім. Алайда, жаным-күнім деп жүрген адамның өзімді боқтағанын көргенде қателескенімді түсіндім. Одан қалды боқтап алып, «жаным ренжімеші» деп отырады.
Шыдамағанымның тағы бір себебі – маған қол көтеретін. Жай ғана ұрып қоймай, әбден естен танғанша сабайтын. Не көргенімді өзім ғана білемін. Оның бар білетіні – адам көрмейтін жерден сабайтын.
Әлі есімде, ауылда үйге дейінгі екі шақырым жолдың бойында ұрған. Жолда талып қалғанымды білемін, құлағаным есімде. Сонда бір мезетте көзімді ашсам қармен бетімді жуып жатыр екен», - дейді Зарина Сапар.
Сөз арасында экс-күйеуінің ата-анасы жайлы да сөз қозғап өтті.
«Ең қатты тигені – ұрып соғуы емес, үйге келгендегі үмітім. Үйде қайын атам отыр, араша түсіп құтқарып қалады ғой деп ойладым. Экс-қайын атам жақсы кісі болған.
Жаңа жылдың қарсаңында үйде достарымен отырған. Мен экс-енем және экс-жолдасыммен қонақта отырған жерден Айдос мені алып кетіп жол бойы сабап әкелді. Үйге келіп «көмектесіңізші» деп айқайлап үлгердім. Экс-жолдасым қолымен мойнымнан қылқындырып, үйдің қабырғасына жабыстырып көтерді. Қайын атам келіп қой деп еді оны бір сілтеп араласпаңыз деді. Әкесін тыңдамаған ер адам тоқтаймын дегенше сабай береді.
Үйге келіп қайын сіңілімнің телефонымен анама хабарласып үлгердім. Әйтпесе ол менің телефонымды құлатып сындыра салатын. Түні бойы ата-енем кешірім сұрады бірақ кететінімді айттым. Ертеңінде анам келгенде экс-күйеуім қорқақтап қашып кетті», - дейді блогер.
