Перизат Қайрат ісі бойынша материалдармен танысу аяқталып, іс прокуратураға жолданды, деп хабарлайды ALASH.KZ.
ҚР ҚМА Перизат Қайрат пен оның анасы Ғайни Алашбаеваға қатысты алаяқтық, сондай-ақ қылмыстық жолмен алынған ақша мен мүлікті заңдастыру фактілері бойынша тергеу аяқталғанын мәлімдеді.
«Биылғы жылдың 19 наурызында процесс қатысушылары 109 томнан тұратын қылмыстық іс материалдарымен танысуға кірісті. Бұған дейін хабарланғандай, ұрланған қаражаттың жалпы сомасы – 3,5 миллиард теңге», – делінген ведомство хабарламасында.
Қылмыстық жолмен алынған 865 миллион теңге көлеміндегі мүлікке бұғау салынған.
«Қылмыстық іс Бас прокуратураға зерделеу және оны сотқа беру мәселесін шешу үшін жолданды», – деп қосты агенттік.
