Шымкентте 17 жастағы студент қыздың қатыгездікпен өлтірілуіне қатысты іс бойынша сот процесі басталды, деп хабарлайды ALASH.KZ.
Айыпталушы орнында — қызбен бұрын қарым-қатынаста болған 19 жастағы жігіт. Тергеу нұсқасы бойынша, ол екеуінің айырылысуына төзе алмай, кек алмақ болған. Orda.kz тілшісі сот залынан мәлімет берді.
Қайғылы оқиға 12 наурызда болған. Қыз жігітпен байланысын үзген және оның нөмірін қара тізімге енгізген. Бұл жағдай қанды қылмысқа себеп болған.
Сотта мемлекеттік айыптаушы, прокурор Әскербек Пошимовтың айтуынша, айыпталушы қылмысқа алдын ала дайындалған: пышақ сатып алып, көлік жалдап, университетке қызды күтіп барған. Жолда екеуінің арасында жанжал туындап, жігіт қаланың шетіне қарай бұрылып, сол жерде қылмыс жасаған.
«Сол жақ көкірек тұсына бір рет, арқа тұсына екі рет пышақ сұққан. Құрбанның өлгеніне көз жеткізу үшін сол қолымен мойын тұсына бірнеше рет пышақ жарақатын салған. Содан кейін оның өлгеніне көзі жеткен. Осыдан соң Тоқылай қылмысын тоқтатпаған, жәбірленушіні толықтай шешіндіріп, оның жалаңаш денесін қараған», – деді прокурор айыптау актісін оқығанда.
Бұнымен қоймай, ол болған оқиғаны видеоға түсірген. Қылмыстан кейін досына барып, екеуі бірге мәйітті қапқа салып, қаладан тысқары жерге тастап кеткен.
Қызынан хабарсыз қалған ата-анасы полицияға жүгінген. Келесі күні-ақ күдіктінің де, марқұмның да мекенжайы анықталған.
«Менің қарындасым өте ашық, турашыл әрі батыл болатын. Сол батылдығының арқасында заңгер болуға бел буды, заң факультетіне оқуға түсті. Қайғылы жағдай ол бірінші курста оқып жүргенде болды. Кішкентайынан-ақ жаңалықтардан әйелдерге қарсы зорлық-зомбылық пен кісі өлтіру туралы естігенде, “Мен заңгер боламын, әйелдердің ар-намысын қорғаймын” дейтін. Оның өмірі тым ерте қиылды. Біз оны қатты сағынамыз. Мұндай қатігез қылмыс жасаған адам жазасыз қалмауы керек. Мен оны өмір бойы бас бостандығынан айыруды сұраймын», – деді марқұмның әпкесі Аружан Ерланқызы.
