Қазақстан Жеңіл атлетика федерациясының (ҚЖАФ) бұрынғы президенті Даниал Ахметов отставкаға кеткеннен кейін ұйым 100 миллион теңгеден астам қарызбен қалған. Бұл туралы sportarena.kz тілшісі Ғұсман Қосановты еске алуға арналған халықаралық жарыс қарсаңында өткен баспасөз мәслихатында хабарлады, деп жазады Alash.kz.
Еске салайық, Даниал Ахметов 2018 жылдан бастап аталған федерацияға жетекшілік етіп келген. Ал 2024 жылдың 11 желтоқсанында өткен есеп беру жиынында ол өз өкілеттігін мерзімінен бұрын тоқтатып, федерация президенті ретінде Ольга Рыпакованы ұсынған еді. Жиынға қатысқан аймақтық федерациялар мен спорт ұйымдарының өкілдері бұл ұсынысты бірауыздан қолдады.
Баспасөз жиынында жаңа президент Рыпакова бұл мәселеге түсініктеме беруден бас тартса, федерацияның жаңадан тағайындалған бас хатшысы, бұрынғы дзюдошы Келбет Нұрғазина бұл ақпаратты растады.
"Иә, бізде өткен жылдан қалған қарыздар мен бірқатар мәселелер бар. Дегенмен бұл қиындықтарды Мәдениет және спорт министрлігімен бірлесе отырып шешіп жатырмыз. Олар бізге қолдау білдіруде. Қарыздың бір бөлігі өтелді, мәселе кезең-кезеңімен шешіліп келеді", –деді Нұрғазина.
