«Әлеуметтік эксперимент» пе, әлде көпшіліктің алдында қорлау ма?
Алматы тұрғындары тазалықшы әйелдердің алдына қоқыс шашқан ер адам түсірілген видеоны талқылауда, деп хабарлайды ALASH.KZ.
Алматы көшелерінің бірінде түсірілген видео әлеуметтік желілерде қызу талқылануда.
Ер адам жүкті қасындағы әйелмен бірге көшені тазалап жүрген әйелдерге жақындап келіп, көз алдында, әдейі қоқысты олардың аяғының астына төгіп жібереді.
Мұның бәрі камераға түсіріліп, үстем үнмен: «Жаман жұмыс істеп жатырсыңдар» деп ескерту айтады.
Тазалықшы әйелдердің бірі мұндай қорлыққа шыдай алмай, көпшіліктің көзінше жылап жібереді. Желі қолданушылары да бұл сәтке куә болды.
Кейін видеоны түсіргендер бұл әрекетті пранк немесе әлеуметтік эксперимент деп түсіндіріп, тазалықшы әйелдерден кешірім сұрап, алғыс айтқанын айтты. Алайда бұл түсініктеме қазақстандықтарды сендірген жоқ. Комментарийлерде мыңдаған адам наразылық білдірді:
«Бұл — қорлау, әзіл емес»
«Пранктың да шекарасы болу керек»
Жұрт қаланы таза ұстауға тырысып жүрген жандарға құрметпен қарауды талап етуде. Адамдарды қорлау арқылы контент жасауға болмайды деген пікірде.
